المطربون يصدرون الأغاني لإشعال الحماس الثوري للمصريين في الميادين

القاهرة – محمود الرفاعي أصدر عدد من المطربين أغاني، لدعم ثورة "30 يونيو"، ودعم حركة "تمرد"، والتي كانت من الأسباب الرئيسية وراء نجاح الثورة، وتعد أبرزها أغنية "تمرد"، التي لم يغنيها مطرب واحد، بل أن صناعها قدموها، لكي يغنيها كل من في ميادين مصر ويتمنى نجاح حركة "تمرد". وكانت البداية كانت مع طرح الأغنية الرسمية لحركة "تمرد"، والتي قدمها عدد من الفنانين المغمورين بموسيقى الراب، وتعد الموسيقى الأم لدعم الحركات الثورية، وإشعال الروح الثورية داخل كل الثوار، وتقول كلمات الأغنية:
أعذروني أنا اللي فكري ثوري
أنا اللي مش بتكلم بس رد فعلي فوري
الموضوع بسيط مش محتاج منكم تفسير
أنا اللي بإيده يغير واللي اتمرد عالتغيير لمه شفت
تصرفاتك غريبه منهم مش مفهومه نفس الأسلوب
 قولوا لي فين حقوق الناس المظلومه
بلد في النازل وحال في تدهور مستمر جيت اتمرد على فكر عالفشل
مصر قولوا لي فين الناس اللي قالت 100 يوم.
ونجد أيضا أن الشركة المنتجة لمسلسل "الداعية" قامت بطرح تتر العمل قبل شهر رمضان، بأكثر من 15، لحث المواطنين على الثورة، نظرًا لأنه العمل الوحيد الذي يتحدث في شهر رمضان عن الرجال الذين يتلاعبون بالدين، فأغنية التتر "انتباه"، استخدمها الثوريون في الميادين، وتقول كلمات الأغنية:
انتباه........انتباه
لو كنتوا بتحبوا الحياه
الخوف جدار ضد النهار
والانتصار طوق النجاة
انتباه لطيور ظلام
بيصادروا حتى الابتسام
ويطاردوا حلمك ف المنام
ويفتشوا عنه ووراه
انتباه ضموا الصفوف
وارسموا فوق الكفوف
فجر يملى عيوننا شوف
شوق لبكرة وللحياه
وأيضا كتب أغنية "تمرد" الشاعر أيمن بهجت قمر، ولحنها وليد سعد، ووزعها طارق عبد الجابر، وتقول كلماتها:
اتمرد وبرد نار اللي ماتوا
نار اللي ضحى بعمره وحياته
واللي استهانوا بدمك وخانوا
بيطبلوا له وفين إنجزاته
عشان كبرياء كرامتك تمرد
حرام مصر تيأس ف صمتك تمرد
ليورك ولادك هزيمتك تمرد
هانت عليهم ياعالم بلادي هما
ف وادي واحنا ف وادي
وقرر المطرب الشاب رامي صبري أن يشارك الثوريين في فرحتهم، وأن يطرح أغنية بعنوان "اتحركوا"، مناهضة للدكتور مرسي، وهي من كلمات تامر حسين، وألحان رامي صبري وأحمد حسين، وتوزيع طارق توكل وتقول كلماتها:
مبقاش في وقت نضيعه ونعيش على وهم وأمل
واللي احنا لازم نفهمه اللي هيعمل كان عمل
دلوقتي يللا اتحركوا.. واكتبوا لمصر الحياة
من قد إيه بتتفرجوا.. ومصر بتقول ألف آه
وكعادة المطربة التونسية لطيفة ووقوفها الدائم مع ثورات الربيع العربي وغناءها الدائم لمصر، قامت خلال أيام الثورة بطرح أغنية بعنوان "عشان محتاج"، وفيها استعانت لطيفة بالشاعر الذي أبهر الجميع في ثورة "25 يناير" نصر الدين ناجي (صاحب أغنية "إزاى")، لكي يكتب لها كلمات الأغنية، وقام بتلحينها أحمد فرحات وأنتجتها لطيفة على حسابها، وتقول الأغنية:
عشان محتاج لميت حاجة
في قلبة بتتولد حاجة
يدوس بيها على روحه ويخسرها
عشان يبقى كسب حاجة
عشان محتاج يطول حلمة
فرد إيده كتب لا على الجدران
علشان لما يموت هو
تعيش منه ولو كلمة
علشان قلبة لسة قادر ع الحياة
علشان جانبة حد بيحاول معاه
علشان إنسان ما قبلش يسيب الضعف يزله
ويكسر كل شيء جواه
سنين وأيام فضل منسي
ماحدش حتى جاب سيرته
ولا دور على غيبته
ولا فكر يشاركه همومه أو حيرته
سنين وأيام فضل منسي
ويوجد في الأغنية اقتباس من أغنية "عشان لازم نكون مع بعض"، التي قدمها عدد كبير من الشباب منذ أشهر، ولكن صناع تلك الأغنية هم نفسهم صناع أغنية لطيفة.
وظهر شريف إسماعيل (نجم برنامج المواهب "صوت الحياة") من جديد، من خلال إطلاق أغنية بعنوان "كفاية"، والتي كتبها الشاعر محمد البوغا ولحنها شريف بنفسه، وتدور حول ظلم الإخوان للمصريين خلال فترة الحكم، التي استمرت لمدة عام، وتقول كلماتها:
قالوا قوتنا في وحدتنا وقسمونا
قالوا نهضة ونزلوا بينا ووقعونا
اقتصادهم كله مبنى ع الشحاتة
وإن عارضنا في أي حاجة يكفرونا كفاية
مصر مش هتعيش كتير تقول أمين
كفاية شعبها مش ناقصه أي درس ف أي دين
 قالوا حرية وعدالة وكممونا
قالوا مشاركة لا مغالبة وهمشونا
قالوا 200 مليار مشوفناش منها حاجة
من النهاردة بقيتوا مش بتمثلونا
أما المطرب محمد حماقي، فأعاد غناء أغنية "بلادي"، التي سبق أن قدمها الفنان الراحل عبد الحليم حافظ، مساندة منه لثوار "30 يونيو"، والأغنية من كلمات محسن الخياط وألحان بليغ حمدي وقام بإعادة توزيعها الموزع خالد عز، لكي تناسب جيل الثورة المصرية.
ولم يكن هؤلاء فقط هم أصحاب أغاني الثورة، فقدم رامي جمال أغنية بعنوان "افهمي"، وقدم نادر نور أغنية بعنوان "بتمرد"، وغنى محمد مغربي أغنية بعنوان "أنا مش خايف"، وأيضًا طرح أوكا وأورتيجا مهرجان غنائي بعنوان "جيشنا العظيم".