حسني شتا يؤكّد أنّ الشعب المصري كان يشبهه بـ "محمود ياسين"

رد الفنان المصري الشاب حسني شتا، على التصريحات السابقة للفنانة والإعلامية رانيا محمود ياسين، بشأن وجود شبه بينه وبين والدها الذي رحل عن عالمنا، الأربعاء الماضي.وقال شتا: "رانيا محمود ياسين مقالتش إني بقلد والدها، أنا بكن لها كل الاحترام ولأسرتها وأستاذ محمود ياسين قامة كبيرة وأنا واحد من جمهوره منذ صغري".وأضاف: "الفنانة رانيا كانت بتلوم على الناس إنهم بيشبهوني شكلا بمحمود ياسين وده يفرق كتير، هي قالت في مداخلة تلفزيونية أنا بحب حسني ومتابعاه بس أنا بلوم على الجمهور إنه بيشبهوه بمحمود ياسين في مسلسل ليالينا 80.. أنا مالي؟!".

وتابع: "ثانيا.. تشبيهي بأستاذ محمود ياسين راجع من الجمهور، أنا عملت قبل كده مسلسل (أيوب) و(بحر) و(الأب الروحي) وفيلم اشتباك وطلق صناعي، محدش شبهني بالنجم الكبير إنما علشان أنا جسدت شخصية في حقبة الثمانينات في ليالينا 80، والفترة دي معظم الشعب المصري من الذكور كانوا شبه محمود ياسين من حيث التفاصيل الشكلية".وأردف: "حتى لو أنا فيا ملامح من محمود ياسين أنا هعمل إيه؟!، دي حاجة متخصنيش وأنا مش بالغباء إني أقارن نفسي بالأستاذ محمود ياسين مهما كانت قدر موهبتي، ولا الأساتذة الكبار محمود عبد العزيز وعادل إمام وأحمد زكي، لإن النجوم دول وضعوا بصمتهم وصنعوا تاريخهم، إنما أنا لسة في بداية مشواري، وعلشان كده مش هقارن نفسي بحد".

وعن انتمائه الكروي وموقفه من خلاف الفنان أحمد فهمي واللاعب محمود عبد الرازق شيكابالا، قال شتا: "أنا زملكاوي طبعًا، والرياضة هدوء نفسي، وشيكابالا وأحمد فهمي نجمان كبيران، أنا بحب شيكا جدا وفهمي صديقي وبحبه جدا، الإخوات بيتخانقوا وإن شاء الله يتصافوا ويتصالحوا".وواصل: "فكرة إن إحنا نتخانق ونتضايق من بعض بسبب الرياضة غريبة جدًا، الرياضة أساسها الأخلاق وبتحافظ على عقلنا وروحنا وقلبنا، وهدفها التسلية، إحنا ممكن نهزر ونتريق إنما نتخانق علشان الكورة وأي رياضة عموما، دي حاجة غريبة، أنا بكره التعصب والمتعصبين في أي حاجة في الدنيا".

واستطرد الفنان الشاب: "لو أي حد اتريق على الزمالك مفيش مشكلة، بس متبقاش غلاط ومتشتمش ومتتنمرش على الي قدامك، إنما الكلام بتاع إحنا خدنا الدوري وأبطال إفريقيا، ده تمام مفيش مشكلة، وعائلتي كلها أهلاوية عدا والدي، ومفيش أي مشكلة، هل هيخاصموا والدي؟، لو في فرح مش هيعزموه؟!".واختتم حسني شتا بالحديث عن أعماله الفنية الجديدة، قائلًا: "بعمل مسلسل في يوم وليلة مع أحمد رزق وشيري عادل ومبسوط أوي بالتجربة دي بصراحة".يذكر أن مسلسل "ليالينا 80" عرض في شهر رمضان الماضي، وشارك في بطولته خالد الصاوي وصابرين وغادة عادل وإياد نصار، وحقق نسب مشاهدة مرتفعة ونال إعجاب الجمهور.

قد يهمك أيضاً:

هايدي موسى تؤدي مناسك العمرة بصحبة والدتها بعباءة سوداء

هايدي موسى تقترب من 2 مليون مشاهدة بأغنية أنا اتعودت